Home » هەواڵ » کوردستانی » مەحمود سەنگاوی: خۆزگە قاسم سولەیمانی فەرماندە و پێشمەرگەی كوردەكان دەبوو
مەحمود سەنگاوی

مەحمود سەنگاوی: خۆزگە قاسم سولەیمانی فەرماندە و پێشمەرگەی كوردەكان دەبوو

ئەندامێكی ئەنجومەنی سەركردایەتی یەكێتی ڕایدەگەیەنێت، خۆزگە قاسم سولەیمانی فەرماندە و پێشمەرگەی كوردەكان دەبوو.

مەحمود سەنگاوی ئەندامی ئەنجومەنی سەركردایەتی یەكێتی و فەرماندەی میحوەری گەرمیانی هێزەكانی پێشمەرگەی كوردستان لە چاوپێكەوتنێكیدا لەگەڵ ئاژانسی تەسنیمی ئێرانی ڕایگەیاند، شۆڕشەكانی ئێمە لە ڕابردوودا زۆرجاران بەشێوەی پارتیزانی بوو، هێرشمان دەكردەسەر دوژمنەكانمان و دواتر بەرەو بارەگاكانی خۆمان دەگەڕاینەوە، پێش پڕۆسەی ئەنفالیش بە چەك ڕووبەڕووی بەعس دەبووینەوە، بەشێوەیەك ڕووبەڕووی چەكی كیمیاوی بەعسیش بووینەوە، بەڵام شەڕكردن لەگەڵ داعش كەمێك سەختتر بوو.

وتیشی”داعش هێزێكی دڕەندە بوون، بەشێوەیەك جۆرەها چەكیان هەبوو هەروەها فڕۆكەی بێ فڕۆكەوانیان هەبوو، تەنانەت چەكی كیمیاویشیان هەبوو كە دژی ئێمە بەكاریاندەهێنا، بەڵام ئێمە بەرگریمان كرد لەكاتێكدا تەنها چەكی سووكمان هەبوو، چەكە قورسەكانمان ئەوانە بوون كە لەكاتی شەڕ دژی بەعس دەستمانكەوتبوو”.

ئاشكراشیكرد، داعش هێزێكی ڕاهێنان پێكراو بوون و توانیان خەڵكێكی زۆر لە جیهان فریو بدەن، بەڵام دواجار توانیمان لەناویان بەرین، هەڵبەتە هێشتا كۆتاییان پێنەهاتووە بەشێوەیەكی تەواوەتی، ئەگەرچی هیچ ناوچەیەكیان لەژێردەستدا نییە، بەتایبەت لە ناوچەكانی ژێر دەسەڵاتی پێشمەرگە، بەڵام بەداخەوە لەناوچەكانی دیكە عیراق جموجوڵیان هەیە و كردەوەی تیرۆریستی ئەنجام دەدەن.

ئاشكراشیدەكات، ئەگەر داعش بەرەو هەرێمی كوردستان بهاتنایە، وێرانیان دەكرد، چونكە خوێنی ئێمە بە بۆچوونی ئەوان حەڵاڵ بوو، خوشك و دایكی ئێمە و هەموو شتێكی سەر ئەم زەمینە حەڵاڵ بوو، ئەوان دەیانویست ئێمە لەناوبەرن، هەرچەندە داعش تەنها دوژمنی ئێمە نەبوو، بەڵكو دوژمنی مرۆڤایەتی بوو، بەڵام زۆرترین دوژمنایەتی لەگەڵ كورد و شیعە هەبوو.

سەبارەت بە ئاشنایی لەگەڵ سوپای پاسداران سەنگای ڕایگەیاند، ماوەیەك ڕووبەڕووی سوپای پاسداران شەڕم كرد و ئێستاش كاریگەری گوللەی ئەوان بە ڕوخسارمەوە ماوە، بەڵام دوای ماوەیەكی ئاشتەوایمان كرد و ئێستا دەورانێكی دوورودرێژە لەگەڵ ئێران پەیوەندی دۆستانەم هەیە و لە ئۆپەراسیۆنی زۆردا لەگەڵ هێزەكانی ئێران بەشدار بووم ئەمانەم لە كتێبی یاداشتەكانم تۆمار كردووە.

سەبارەت بە هاوكاریەكانی ئێران لە شەڕی داعش، مەحمود سەنگاوی وتی”ئێرانییەكان هاوكارێكی زۆر باشی ئێمە بوون، هەڵەبەتە داعش مەترسی بۆ هەموان هەبوو، ئێرانیەكان جگە لە خۆیان دەبوو بەرگری لە شیعەكانی عیراقیش بكەن، هەڵبەتە ئێمە لەگەڵ سوپای عیراق و حەشدی شەعبی هاوكاری یەكتر بووین”.

سەبارەت بە بەشداری سولەیمانی لە جەنگەكاندا، ناوبراو ڕایگەیاند، جارێك لە چاوپێكەتنێكدا وتم خۆزگە قاسم سولەیمانی فەرماندە و پێشمەرگەی ئێمەی كورد دەبوو، شتێك كە تەنها لەو كەسەدا بینێبێتم لیاقەت و قارەمانی بوو، سولەیمانی كەسێكی دڵسۆز بوو بە باشی پارێزگاری لە وڵاتەكەی خۆی دەكرد لە كۆتایشدا گیان لەو بارەوە بەخت كرد.

Leave a Reply

Your email address will not be published.

Time limit is exhausted. Please reload the CAPTCHA.