Home » هەواڵ » کوردستانی » کەنەکە: تورکیا دەیەوێت هەمو دەستکەوتەکانی گەلی کورد لەرۆژئاوای کوردستان لەناوبەرێت
کەنەکە

کەنەکە: تورکیا دەیەوێت هەمو دەستکەوتەکانی گەلی کورد لەرۆژئاوای کوردستان لەناوبەرێت

کۆنسەی بەڕێوەبەریی کۆنگرەی نەتەوەیی کوردستان (کەنەکە) رایگەیاند، لە باکور و رۆژئاوا و باشوری کوردستان، هێرشی قڕکردن و لەناوبردن هەر بەردەوامە، دەوڵەتی تورکیا بەشێکی رۆژئاوای کوردستانی داگیرکردوە و دەیەوێت هەمو دەستکەوتەکانی گەلی کورد لەو پارچەدا لەناوبەرێت، “دەمێکیشە روی لە باشوری کوردستان کردوە و رۆژ دوای رۆژ داگیرکارییەکانی لەو بەشەشدا فراوانتر دەکات”.

کۆنسەی بەڕێوەبەریی کۆنگرەی نەتەوەیی کوردستان (کەنەکە) لە راگەیەندراوێکدا بەبۆنەی جەژنی رەمەزانی پیرۆز رایگەیاندوە، “جەژنی ئەمساڵ بە قۆناغێکی مێژوییدا بەسەر گەلی کوردستان و گەلانی جیهاندا تێپەڕدەبێت، ئێستا دنیا بە گشتی بەرامبەر پەتای کۆرۆنا لە هەوڵێکی زۆردایە، مخابن خەڵک ناتوانن ئەم جەژنە بە شێوەیەکی ئاسایی بکەن و ماڵ بە ماڵ بگەڕێن و پیرۆزبایی لە یەکتر بکەن، ئەم قۆناغە بۆ گەلانی جیهان چارەنوسازە، بەڵام لە هەمو حاڵێکدا جەژن بە واتاکانی خۆیەوە پیرۆز دەکرێت، جەژن لەم رۆژە سەختانەدا هێزێکە و ئیرادەیەکی زیاتر بە خەڵک دەدات تا لەبەردەم نەخۆشی و بۆ ئاواکردنی ژیانێکی باشتر بە ئاشتی بەختەوەریی”.

ئاماژەی بەوەشکردوە، لەم دۆخە ئاڵۆزەشدا دوژمنان راناوەستن و بەردەوامن لە هێرشەکانیان، لە باکور و رۆژاواو باشوری کوردستان، هێرشی قڕکردن و لەناوبردن هەر بەردەوامە، دەوڵەتی تورکیا بەشێکی رۆژئاوای کوردستانی داگیرکردوە و دەیەوێت هەمو دەستکەوتەکانی گەلی کورد لەو پارچەدا لەناوبەرێت.

تورکیا دەمێکیشە روی لە باشوری کوردستان کردوە و رۆژ دوای رۆژ داگیرکارییەکانی لەو بەشەشدا فراوانتر دەکات، ئەمە لە کاتێکدا کە باشوری کوردستان خۆی لە قەیرانی قوڵدایە

کەنەکە باسی لەوەشکردوە، “تورکیا دەمێکیشە روی لە باشوری کوردستان کردوە و رۆژ دوای رۆژ داگیرکارییەکانی لەو بەشەشدا فراوانتر دەکات، ئەمە لە کاتێکدا کە باشوری کوردستان خۆی لە قەیرانی قوڵدایە، لە رۆژهەڵاتیش دۆخی ئاڵۆز هەر بەردەوامە، رۆژانە بە ناوی پاراستنی سنورەوە کۆڵبەر و کاسبکاری کورد دەکوژرێن، لە لایەکی دیشەوە گرتن و ئەشکەنجەو لەسێدارەدان بەردەوامن”.

ئەوەشی خستوەتەڕو، لەبەرامبەر هێرش و داگیرکاریشدا بەرخۆدانێکی بێوێنە دەکرێت، شەڕی ئازادی و بەرخۆدانی گەلی ئێمە بە هەمو شێوازێک بەردەوامە، “بێگومان گەلی کورد  لە هەرچوار پارچەی کوردستان و لە هەمو شوێنێکی تر، ئەو خەڵکەی جاران نین، ئێستا هۆشیارە و لە ناو تێکۆشانێکی نەتەوەیی دیموکراتکی سەردەمیدایە، ئیدی نە دەرۆزەکەری بەردەرگای زۆردارانەو نە بەو درۆیانە دەخەلەتێ و نە ژێردەستیش قبوڵ دەکات، ئیدی هیوای بە خۆی و رێبەرایەتی خۆی و تێکۆشانی خۆی هەیە”.

Leave a Reply

Your email address will not be published.

Time limit is exhausted. Please reload the CAPTCHA.