Home » هەواڵ » ڕۆژهەڵاتی ناوەڕاست » بەڕێوەبەرایەتی خۆسەر: دەوڵەتی تورکیا نوێنەرایەتی پڕۆژەیەک دەکات کە ئامانجی وێرانکردنی هەرێمەکەیە
بنكه‌ی سه‌ربازیی -تورکیا

بەڕێوەبەرایەتی خۆسەر: دەوڵەتی تورکیا نوێنەرایەتی پڕۆژەیەک دەکات کە ئامانجی وێرانکردنی هەرێمەکەیە

بەڕێوەبەرایەتی خۆسەریی باکور و رۆژهەڵاتی سوریا رایگەیاند، دەوڵەتی تورکیا لە ناوچەکە، “نوێنەرایەتی پڕۆژەیەک دەکات کە هەڵوەشاندنی کردوە بە ئامانجی خۆی”، بانگەوازیەکیشی ئاڕاستەی کۆمەڵگای نێودەوڵەتی کرد کە کۆتایی بەو سیاسەتەی بهێنن.

بەڕێوەبەریایەتی خۆسەری باکور و رۆژهەڵاتی سوریا لە راگەیەندراوێکدا بڵاویکردەوە، “دەوڵەتی تورکیا لە ناوچەکە بەردەوامە لە سیاسەتە وێرانکاریەکانیدا، بە تایبەت دوای ئەوەی شۆپۆلی رەگەزپەرەستی تورکی تورانی کە لەگەڵ شۆپۆلی ئیسلامی سیاسی و ئیخوانی لە سەرەتای سەدەی نوێوە بو بە یەک، ئیدی سیاسەتی هەڕەشەئامێر و قوڵکردنەوەی ناکۆکیەکانی لە ناوچەکە پەیرەو کرد”.

ئاماژەی بەوەشکردوە، “دەوڵەتی تورکیا گشت پێوانە ئەخلاقی و یاسایی و بێلایەنەکانی ناوچەکە پێشەل دەکات، هەر وەکو لە سوریا ئەنجامی دەدات، هەمان سیاسەت لە عێراقیش پەیڕەو دەکات، ئەمڕۆش لە دەریای سپی، ئەوروپا و ئاسیاش بوە بە هەڕەشەیەکی جددی، هەروەکو لە یۆنان و لیبیا ئەنجامی دەدات”.

بەڕێوەبەرایەتی خۆسەریی باکور و رۆژهەڵاتی سوریا ئەوەشی خستەڕو، “تورکیا لە میسریش پشتیوانی لە ئیخوان موسلیمین دەکات و دەست لە کاروباری ئەفریقاش وەردەدات، لە سەرەتای دەستپێکردنی ئاڵۆزیەکانی سوریاوە، رۆڵێکی نەرێنی و وێرانکارانەی بینیوە، پەرەی بە پڕۆەژی داگیرکەری، پارچەکردن و جیاکردنەوە جۆگرافیا و کۆمەڵاگای داوە، بزوتنەوەی گەلیان گۆڕی بۆ ناکۆکی تایفی و رەگەزی، پشتیوانی گروپە توندڕەوەکانی کرد کە لە بەردەم چارەسەری و رێکەوتنی نشتیمانی لە سوریا بون بە رێگر”.

رونیشیکردەوە، هەروەها دەوڵەتی تورکیا، کێشەکانی نێوان ئازەربایجان و ئەرمەنیستانی قوڵتر کردەوە، دوای ئەوەی پشتیوانی لە ئازەربایجان کرد و گروپە چەتەکانی رەوانەی ئەوێ کرد، ئەوەش ئامانجەکانی بۆ داگیرکەری و بەرفراوانکردنی دەسەڵاتەکەی دەخاتەڕو، ئەردۆگان بە بیانوی ئەوەی تورکیا و ئازەربایجان یەک گەلن و دو دەوڵەتن، راستەخۆ دەستەوەردانی لەو ناکۆکیانەدا کرد.

بەڕێوەبەرایەتی خۆسەریی باکور و رۆژهەڵاتی سوریا دەشڵێت، “ناکۆکییەکان قوڵتردەکاتەوە و دژایەتی خۆی لە بەرامبەر گەلی ئەرمەنی بەکادێنێت، بۆ ئەوەی بەرژەوەندیەکانی خۆی بپارێزێت و ئەو تاوانانەی ئەنجامی داون، بیانشارێتەوە، واتە دەیەوێت ئاڵۆزیەکانی خۆی رەوانەی دەرەوە بکات، بە رێکارە سەربازیەکان هەوڵ دەدات دەستوەردان لە هەر کێشەیەکدا بکات، دەیەوێت ئاڵۆزیەکان قوڵتر بکاتەوە و ئەوە پیشان بدات کە هیچ رێگایەک جگە لە رێگای سەربازی بونی نیە، ئەوەش لە کاتێکدایە کە دەرفەتی چارەسەری بە رێگای دیالۆگ لە ئارادا هەن، ئەمەش بۆ ئاسایشی ناوچەکە و نێودەوڵەتیش هەڕەشەیە و پەرە بە ناکۆکی و خوێنڕێژی لە سەرتاسەری قەفساس دەدات”.

دەشڵێت، “دەوڵەتی تورکیا نوێنەرایەتی پڕۆژەیەک دەکات کە ئامانجی وێرانکردنی هەرێمەکەیە، ئەمە پڕۆژەیەکی مەترسیدارە، نەک تەنها هەڕەشەیە بۆ سەر هەرێمێکی دیاریکراو، بەڵکو بە زیهنیەتە فاشیستەکەی، دەستی بۆ هەمو شوێنێک درێژ کردوە، هەوڵ دەدات بارودۆخی شەڕ بسەپێنێت، بۆیە پێویستە کۆمەڵگای نێودەوڵەتی راستەوخۆ و بە پەلە دەستوەردان بکات”.

Leave a Reply

Your email address will not be published.

Time limit is exhausted. Please reload the CAPTCHA.