Home » هەواڵ » کوردستانی » ته‌ندروستیی گه‌رمیان هاووڵاتییان له‌هاتنی شه‌پۆلێكی مه‌ترسیداری نه‌خۆشیی كۆرۆنا ئاگادار ده‌کاته‌وه‌
د. سیروان حه‌سه‌ن به‌ڕێوه‌به‌ری گشتیی ته‌ندروستیی گه‌رمیان

ته‌ندروستیی گه‌رمیان هاووڵاتییان له‌هاتنی شه‌پۆلێكی مه‌ترسیداری نه‌خۆشیی كۆرۆنا ئاگادار ده‌کاته‌وه‌

به‌ڕێوه‌به‌ری ته‌ندروستیی گه‌رمیان هۆشداریی له‌سه‌ر هاتنی شه‌پۆلێكی مه‌ترسیداری نه‌خۆشیی كۆرۆنا ده‌دات و ده‌ڵێ: ئه‌و شه‌پۆله‌ به‌شێك له‌ ناوچه‌كانی هه‌رێمی كوردستانی گرتووه‌ته‌وه‌ و به‌ره‌و گه‌رمیان دێت.

ئه‌مڕۆ پێنجشه‌م هه‌شتی تشرینی یه‌كه‌م، د. سیروان حه‌سه‌ن به‌ڕێوه‌به‌ری گشتیی ته‌ندروستیی گه‌رمیان له‌لێدوانێکیدا بۆ میدیاکان ڕاگه‌یاند، به‌ پێویستی ده‌زانین هاووڵاتییانی گه‌رمیان له‌ هاتنی شه‌پۆلێكی مه‌ترسیداری ڤایرۆسی كۆرۆنا ئاگادار بكه‌ینه‌وه‌، ئێسته‌ بووه‌ته‌ مه‌ترسییه‌كی حاشاهه‌ڵنه‌گر و گواستنه‌وه‌شی زۆر خێرا بووه‌.

زیاتر گوتی، سه‌ره‌تا چه‌ند پێشبینییه‌ك له‌باره‌ی ڤایرۆسی كۆرۆنا بڵاو كرانه‌وه‌ كه‌ ئێسته‌ ده‌ركه‌وتووه‌ هه‌ڵه‌ بوون، چونكه‌ ده‌گوترا ڤایرۆسه‌كه‌ له‌ وه‌رزی گه‌رما به‌ره‌و له‌ناوچوون ده‌چێت، كه‌چی به‌پێچه‌وانه‌وه‌ زیاتر بڵاو بووه‌وه‌.

به‌ڕێوه‌به‌ری گشتیی ته‌ندروستیی گه‌رمیان باسی له‌وه‌ش كرد، ئه‌گه‌رچی گه‌رمیان له‌ زۆر له‌ ناوچه‌كانی كوردستان كه‌متر ژماره‌ی تووشبووانی لێ تۆمار ده‌كرا، به‌ڵام له‌م رۆژانه‌دا شه‌پۆلێكی تری بڵاوبوونه‌وه‌ی ڤایرۆسه‌كه‌ ڕووی له‌ ناوچه‌كه‌ كردووه‌ و ژماره‌ی تووشبووانی به‌رز كردووه‌ته‌وه‌، بۆیه‌ خۆپارێزی ئێسته‌ له‌ هه‌موو كاتێك گرنگ و پێویستتره‌.

به‌پێی ئه‌و ئامارانه‌ی وه‌زاره‌تی ته‌ندروستیی حكوومه‌تی هه‌رێمی كوردستان بڵاوی كردووه‌ته‌وه‌، له‌ سه‌ره‌تای بڵاوبوونه‌وه‌ی ڤایرۆسی كۆرۆنا له‌ هه‌رێمی كوردستان تا ئێسته‌، 150 كه‌س به‌و ڤایرۆسه‌ له‌ گه‌رمیان گیانیان له‌ ده‌ست داوه‌.

له‌ لایه‌كی تریشه‌وه‌، هه‌ڤاڵ ئیبراهیم گوته‌بێژی ئیداره‌ی گه‌رمیان ڕاگه‌یاند، ته‌واوی فه‌رمانبه‌رانمان ئاگادار كردووه‌ته‌وه‌ كه‌ ده‌مامك و ده‌ستكێش به‌كار بێنن و پابه‌ندی ڕێنوێنییه‌كانی ته‌ندروستی بۆ خۆپارێزی له‌ ڤایرۆسی كۆرۆنا بن.

Leave a Reply

Your email address will not be published.

Time limit is exhausted. Please reload the CAPTCHA.