Home » هەواڵ » کوردستانی » حەشدی شەعبی لەبارەی هێرشە موشەکییەکەی هەولێر لێکۆڵینەوەی دەستپێکردووە

حەشدی شەعبی لەبارەی هێرشە موشەکییەکەی هەولێر لێکۆڵینەوەی دەستپێکردووە

فەرماندەیی نەینەوای هێزەکانی حەشدی شەعبی رایگەیاند، ئەو شوێنەی هێرشە موشەکییەکەی هەولێری لێوە ئەنجام دراوە، ناوچەیەکە شوێنی نیشتەجێبون نیە و سێگۆشەیەکی ئەمنییە لە نێوان سوپای عێراق، حەشدی شەعبی، هێزەکانی شەبەک و هێزی پێشمەرگە و لێکۆڵینەوەش لەبارەی چۆنیەتی روداوەکە دەستیپێکردوە.

فەرماندەیی نەینەوای هێزەکانی حەشدی شەعبی لە راگەیەنراوێکدا بڵاویکردەوە، دوای ئەوەی شەوی ژمارەیەک موشەک ئاڕاستەی شاری هەولێر کراون، لێکۆڵینەوەیان لەبارەی شوێنی هەڵدانی موشەکەکان کردوە و بۆیان دەرکەوتوە ئەو ناچەیە هیچ کەسێکی تێدا ناژی و سێگۆشەیەکی ئەمنییە لەنێوان سوپای عێراق، حەشدی شەعبی، هێزەکانی شەبەک و هێزی پێشمەرگە.

ئەوەش هاتوە، بەسود وەرگرتن لەکامێراکانی چاودێری بەدواداچون دەکەن بۆ ئەوە بزانرێت ئەو ئۆتۆمبێلەی موشەکەکانی لەسەر بوە لەکوێوە هاتوە، هەروەها بەفەرمانی لیوای 30ـی حەشدی شەعبی لێکۆڵینەوە لەروداوەکە بەردەوامی دەبێت بۆ ئەوەی بزانرێت ئەو ناوچەیەی ئۆتۆمبێلەی لێ بوە لەژێر کۆنتڕۆڵی کام هێزدایە.

وەزارەتی ناوخۆی هەرێمی کوردستان شەوی رابردو بڵاویکردەوە، لە سنوری (برگلە) کە لەلایەن حەشدی شەعبی لەسنوری پارێزگای نەینەوا بەڕێوە دەبردرێت، شەش موشەک بە ئاراستەی فڕۆکەخانەی نێودەوڵەتی هەولێر هاوێژراون و روداوەکەش زیانی گیانی نەبوە، سەرەڕای ئیدانەکردنی ئەو هەنگاوەش داوا لە حکومەتی عێراق دەکەن رێکاری پێویست و “ئیجرائات” بکات.

Leave a Reply

Your email address will not be published.

Time limit is exhausted. Please reload the CAPTCHA.