Home » هەواڵ » عێراق » سلێمانی.. دەنگ لەسەر سێ بەڕێوەبەری گشتی دەدرێت

سلێمانی.. دەنگ لەسەر سێ بەڕێوەبەری گشتی دەدرێت

ئەنجومەنی پارێزگای سلێمانی رۆژی سێشەممە کۆدەبێتەوە و دەنگ لەسەر بەڕێوەبەری گشتی رۆشنبیری، چاودێری کۆمەڵایەتی و رێگاوبان و ئاوەدانکردنەوەی سلێمانی دەدات و پرسی سوتانی سنوبەرەکانی تاسڵوجە و پلانی شارەوانی بۆ چارەسەرکردنی کەموکوڕییەکان بەئامادەبونی پارێزگار و سەرۆکی شارەوانی تاوتوێ دەکات.

ئەنوەر تاهیر، ئەندامی ئەنجومەنی پارێزگای سلێمانی  رایگەیاند، کۆبونەوەکەی رۆژی سێشەممەی ئەنجومەنی پارێزگای سلێمانی لەدو تەوەر پێکدێت، تەوەری یەکەم تایبەت کراوە بە دەنگدان لەسەر سێ کاندیدی بەڕێوەبەری گشتی کە ئەوانیش کاندیدانی پۆستی بەڕێوەبەری گشتی رۆشنبیری، بەڕێوەبەری گشتی چاودێری کۆمەڵایەتی و بەڕێوەبەری گشتی رێگاوبان و ئاوەدانکردنەوەی سلێمانی، ناوی هەرسێ کاندیدەکەش رادەستی سەرۆکایەتی ئەنجومەن کراوە.

ئاماژەی بەوەشکرد، تەوەری دوەمی کۆبونەوەکە تایبەتکراوە بە بانگهێشتی پارێزگاری سلێمانی و  سەرۆکی شارەوانی، بەڕێوەبەری دارستان و ژینگەی سلێمانی تایبەت بە کارو چالاکییەکانیان، “پەیوەست بانگهێشتی پارێزگاری سلێمانی بۆ ئەوەیە بزانین کاروچالاکی داهاتویان چی دەبێت، هەروەها  بانگهێشتی دو بەرپرسەکەی دیکە پەیوەندی هەیە بە روداوی سوتانی سنوبەرەکانی تاسڵوجە و ئەو گرفتانەی کە لەماوەی رابردودا رویداوە”.

ئەو ئەندامەی ئەنجومەنی پارێزگای سلێمانی ئەوەشی خستەڕو، لەکۆبونەوەکەی رۆژی سێشەممەی ئەنجومەنی پارێزگای سلێمانیدا باس لەو کێشە و کەموکوڕییانەش دەکرێت کەلەئێستادا لەسنوری شارەوانی سلێمانیدا بونیان هەیە لەگەڵ چۆنیەتی چارەسەرکردنیان و گوێبیستی پلان شارەوانی لەو ڕوەوە دەبن.

Leave a Reply

Your email address will not be published.

Time limit is exhausted. Please reload the CAPTCHA.