Home » هەواڵ » کوردستانی » سەڵاحەدین بەهادین: پیلان دژی ئاینی ئیسلام هەیە
سەڵاحەدین بەهادین

سەڵاحەدین بەهادین: پیلان دژی ئاینی ئیسلام هەیە

ئەمینداری گشتی یەكگرتوی ئیسلامی کوردستان رایگەیاند، هەست دەكەن پیلان دژی ئاینی پیرۆزی ئیسلام هەیە و لە هەمو سەردەمەكانیشدا ئەو پیلانانە هەبون، بۆیە ئەركی زانایان و كەسانی بانگخواز و كۆمەڵە ئیسلامیەكان ئەوەیە زیاتر ستراتیژی بن و بیركردنەوەی قوڵمان هەبێت بۆ ڕوداو و گۆڕانكارییەكان و یەكڕیزی بپارێزین و مامەڵەی سەردەم بكەن.

سەڵاحەدین بەهادین، ئەمینداری گشتی یەكگرتوی ئیسلامی كوردستان لەمیانەی كۆنفرانسی پێنجەمی زانایان كە لە ئامەد بەشێوەی ئۆنلاین بەڕێوەدەچێت، رایگەیاند، “هەر راپەڕین و هەر جوڵەیەك بیەوێت خزمەت بە ئاینی پیرۆزی ئیسلام و هاوڵاتیان و نیشتیمان بكات پێویستە زانایان و بانگخوازان ڕۆڵیان تێیدا هەبێت و ئەگەر زانایان چاویان لە دەمی خەڵكی و تۆڕە كۆمەڵایەتیەكان و چەپڵەی خەڵكی بێت و بیانەوێت لەوێوە بڕۆنە ناو هاوڵاتیان، یان چاویان لە قبوڵی دەسەڵات و رازیكردنی رژێمەكان بێت ئەوە كارەساتەو پێویستە زانایان و بانگخوازان نەچاویان لە دەسەڵات بێ و نە لەخەڵك بێت، بەڵكو چاویان لەسەر ڕەزامەندی خوداو ئاینی پیرۆزی ئیسلام بێت.

 ئاماژەی بەوەشکرد، “لەم ڕۆژگارەدا هەست دەكەین پیلان دژی ئاینی پیرۆزی ئیسلام هەیە و لە هەمو سەردەمەكانیشدا ئەو پیلانانە هەبون، بۆیە ئەركی زانایان و كەسانی بانگخواز و كۆمەڵە ئیسلامیەكان ئەوەیە زیاتر ستراتیژی بن و بیركردنەوەی قوڵمان هەبێت بۆ ڕوداو و گۆڕانكارییەكان و یەكڕیزی بپارێزین و مامەڵەی سەردەم بكەین بەو شێوەیەی كە خودا دەیەویت بە پلان و هاوسەنگی و عەقڵكاری ڕوبەڕوی كێشەكان بینەوە”.

سەڵاحەدین بەهادین باسی لەوەشکردوە، “لە وڵاتانی ئیسلامیدا بە بۆنەی تەكنەلۆژیاو چاولێكەری وڵاتانی دیكە، حاڵەتێك لە چاولێكەری و سەرنجڕاكێشی بە بێگانە زاڵە بەسەر كۆمەڵگەو بەتایبەت چینی گەنج و لاوەكانماندا، وەك ئاشكرایە تەكنەلۆجیاو تۆڕە كۆمەڵایەتیەكان زۆر شتی تێكداوەو كۆمەڵگەكانی تێكەڵ و پێكەڵ كردوەو گەنجان بونەتەقوربانی، دەبێت لە هەمان ڕێگەو بەهەمان كەرەستە بزاڤی ئیسلامی كار لەسەر ئەو پرسە بكات”.

ئەمینداری گشتی یەكگرتو ئەوەشی خستەڕو، ناكۆكی و ناڕێكی لە ئەنجامی ڕاجیاوازی، نابێت بگاتە لێك خوێندن و یەكتر شكاندن و بەربونەیەكتری و پێویستە گرنگی تەواوبدرێت بە ڕۆحی پێكەوەژیان،  توندڕەوی و توندفیكر و سەرلێشوان لە مێژودا هەر هەبوە، بەڵام لەمڕۆدا دەستانێكی بێگانە هەیە هەم ئاودێری دەكات، هەم لەڕوی هەواڵگری و دەزگا تایبەتەكانەوە پەرەی پێدەدەن و هەمیش دەیانەوێت بیناسێنن بە ئیسلامی راستەقینەو هەر دەنگێك دژ نەبێت بەوە ئەوە بە كەمتەرخەمی تۆمەتبار دەكرێت كە بەداخەوە ئەوە فێڵێكی گەورەیەو ئەوە كاری زۆر دەوێت كە زانایان كاری  لەسەر بكەن.

سەڵاحەدین بەهادین رونیشیکردەوە، ئیسلامیەكان و زانایان و كەسانی بانگخواز دەبێت ڕێكخستنیان بۆ سەردەمەكە هەبێت و پرۆژەكەیان قوڵتر بێت لەوەی هەمیشە لە پەرچەكرداردا بن و دەبێت كرداریان هەبێت و مەشغوڵ نەبن بە پەرچەكردارو كەسانی زانا نابێت مەشغوڵ بێت بەو سیاسەتەی كە هەر ڕۆژەو بەجۆرێك خەڵكی پێ مەشغوڵ دەكەن.

Leave a Reply

Your email address will not be published.

Time limit is exhausted. Please reload the CAPTCHA.