Home » هەواڵ » کوردستانی » كۆمه‌ڵى ئیسلامی كوردستان لەسەر ململانێكانی پارتی و پەكەكە راگەیەندراوێكی بڵاوكردەوە
ئه‌نجومه‌نى سیاسیى، كۆمه‌ڵى ئیسلامی كوردستان

كۆمه‌ڵى ئیسلامی كوردستان لەسەر ململانێكانی پارتی و پەكەكە راگەیەندراوێكی بڵاوكردەوە

ئه‌نجومه‌نى سیاسیى، كۆمه‌ڵى ئیسلامی كوردستان لەسەر ململانێكانی پارتی و پەكەكە راگەیەندراوێكی بڵاوكردەوە و رایدەگەیەنێت،”بە پارتى دەڵێین: كه‌ شه‌ڕى كورد و كورد قه‌ده‌غه‌ بكه‌ن و دژى بوه‌ستن” داواش لە پەكەكە دەكات بارى خراپى سیاسیی و ئابورى خه‌ڵكى هه‌رێمى كوردستان له‌به‌رچاو بگرێت.

لەو راگەیەندراوەدا كە وێنەیەكی گەیشتوەتە هیوای کورد-ی هاتوە،”وێڕاى خراپی دۆخى هه‌مو پارچه‌كانى كوردستان، لێره‌و له‌وێ باس له‌ هه‌ڵگیرساندنى شه‌ڕ ده‌كرێت له‌نێوان دو لایه‌نى كوردى، ئێمه‌ بۆ مێژو هه‌مو شه‌ڕێكى (كورد – كورد) ئیدانه‌ ده‌كه‌ین و ڕه‌تیده‌كه‌ینه‌وه‌، وه‌ داوا له‌ سه‌رجه‌م چین و توێژه‌كان ده‌كه‌ین كه‌ خۆیان له‌م باسكردنانه‌ بپارێزن، چونكه‌ هه‌ر باسكردنی، بۆخۆى زه‌مینه‌سازییه‌ بۆ هه‌ڵگیرساندنى شه‌ڕ.”

دەقی راگەیەندراوەكە:

بسم الله الرحمن الرحیم
جه‌ماوه‌رى كوردستان
حیزب و لایه‌نه‌ سیاسییه‌كان
وێڕاى خراپی دۆخى هه‌موو پارچه‌كانى كوردستان، لێره‌و له‌وێ باس له‌ هه‌ڵگیرساندنى شه‌ڕ ده‌كرێت له‌نێوان دوو لایه‌نى كوردى، ئێمه‌ بۆ مێژوو هه‌موو شه‌ڕێكى (كورد – كورد) ئیدانه‌ ده‌كه‌ین و ڕه‌تیده‌كه‌ینه‌وه‌، وه‌ داوا له‌ سه‌رجه‌م چین و توێژه‌كان ده‌كه‌ین كه‌ خۆیان له‌م باسكردنانه‌ بپارێزن، چونكه‌ هه‌ر باس كردنی، بۆخۆى زه‌مینه‌سازییه‌ بۆ هه‌ڵگیرساندنى شه‌ڕ.

وه‌ لێره‌شه‌وه‌ به‌ هه‌ردوو هێزى چه‌كدارى باشوور (یه‌كێتى و پارتى)، به‌تایبه‌ت (پارتى) (كه‌ ئێستا ناوى ده‌هێنرێت وه‌كو لایه‌نێكى شه‌ڕه‌كه‌) ده‌ڵێین؛ كه‌ شه‌ڕى كورد و كورد قه‌ده‌غه‌ بكه‌ن و دژى بوه‌ستن، چونكه‌ دواجار به‌ زه‌ره‌رى هه‌موو كورده‌.

وه‌ داواش له‌ (په‌كه‌كه‌) ده‌كه‌ین، كه‌ بارى خراپى سیاسیی و ئابوورى خه‌ڵكى هه‌رێمى كوردستان له‌به‌رچاو بگرێت و ڕێز له‌ دامه‌زراوه‌ فه‌رمییه‌كان بگرێت. گه‌ر ڕاست بێت ته‌قاندنه‌وه‌ى بۆرى نه‌وت ده‌ستى ئه‌وانى له‌پشت بێت، ئه‌وا كارێكى خراپه‌و دژ به‌ خه‌ڵكى هه‌رێم ئه‌نجامدراوه‌، ئه‌م میلله‌ته‌ به‌ش مه‌ینه‌ته‌ كه‌ به‌ دوو مانگ جارێك به‌شه‌ مووچه‌یه‌ك وه‌رده‌گرێت، به‌رگه‌ى شه‌ڕى كورد كوژى ناگرێت و داواش له‌ حكومه‌تى هه‌رێم ده‌كه‌ین ئه‌مه‌ش نه‌كاته‌ پاساوى زیاتر بۆ بارگرانكردنى ژیان و گوزه‌رانى هاووڵاتیان و دواخستنى زیاترى مووچه‌ى فه‌رمانبه‌ران.

له‌ كۆتاییدا داواكارین هه‌موو لایه‌ك خۆ له‌ گرژیى و ئاڵۆزى و زه‌مینه‌ى شه‌ڕ بپارێزن و به‌زه‌ییه‌كیان به‌ حاڵى میلله‌تى كورددا بێته‌وه‌.

ئه‌نجومه‌نى سیاسیى/
كۆمه‌ڵى ئیسلامیى كوردستان
31/10/2020

Leave a Reply

Your email address will not be published.

Time limit is exhausted. Please reload the CAPTCHA.