Home » هەواڵ » عێراق » “ڕێککەوتنەکەى حكومەتی هەرێم و بەغدا پێک نایەت”
پادێ

“ڕێککەوتنەکەى حكومەتی هەرێم و بەغدا پێک نایەت”

سەرۆکی پارتى ئازادی و دیموکراسیى ئێزدییەکان رایگەیاند،”ڕێککەوتنەکەى حكومەتی هەرێم و بەغدا لەسەر شەنگال جێبەجێناکرێت”

عومەر ساڵح ئیبراهیم، سەرۆکی پارتى ئازادی و دیموکراسیى ئێزدییەکان (پادێ – PADÊ) دەربارەی ڕێککەوتنی نێوان حكومەتی هەرێم و حکومەتی عێراق لەسەر شنگال بە ئاژانسی فورات نیوزی راگەیاندوە،”بەبێ ڕازەمەندیی خەڵکی شنگال کراوە، ئێمە لەو باوەڕەداین ئەو ڕێککەوتنە پێک نایەت لەبەر ئەوەی ئەو کەسانی بەرخۆدانیان کردووە و زەحمەتیان کێشاوە لە شنگال زۆرن، بەڵام نە حکومەتی هەرێمی کوردستان نە حکومەتی عێراق بیریان لەو کەسانە نە کردوەتەوە.”

راشیگەیاندوە،”ئەو ڕێککەوتنەی کراوە هیچ ڕەزامەندیی گەلی شنگالی لەسەر نەبو،  زۆر کەس لە ناو پارتی دیموکراتی كوردستان و  گەلی ئێمەی ئیزدی لە ناو کەمپەکانیش ئاگایان لەو ڕێککەوتنە نەبو، لە 80٪ی خەڵکی شنگال ئەو ڕێککەوتنەی بە دڵ نییە و قبوڵی ناکات”

سەبارەت بە هێزەكانی ناو شنگال رایگەیاند،”هەمو ئەو هێزانەی ئێستا لە عێراق بونیان هەیە هێزی فەرمیی عێراقن، یەبەشە و یەژەشە، حەشدی شەعبی هەمو هێزەکانی تری وەک پۆلیس هێزی فەرمین و سەر بە حکومەتی عێراقن، ئەو دەنگۆیانەی باس دەکرێت کە شنگال نا ئارامە دورە لە ڕاستییەوە، بەڵکو پێشتر نا ئارام بو کە کاتێک هێزی پارتی لێرە بو، لە ساڵی 2014 کاتێک داعش هێرشی کرد نزیکەی 12 تا 14 هەزارا چەکداری پارتی لێرە هەبون، بەڵام هەمویان ڕایانکرد و گەلی ئێزدیان نە پاراست، لەبەر ئەوەیە گەلی ئیزدی باوەڕی بە هیچ هێزێکی تر نییە”.

دەشڵێت،”ڕۆژی 9 ئۆکتۆبەر ڕۆژێکی شومە بۆ گەلی کورد، چونکە لەو ڕۆژەدا لەسەر عەبدوڵا ئۆجەلان لە ساڵی 1988 پیلانگێریی نێودەوڵەتی دەستیپێکرد، لە هەمان ڕۆژدا ساڵیك پێش ئێستا دەوڵەتی تورکیا هێرشی بۆسەر سەریکانی و گرێ سپی دەستپێکرد، بەهەمان شێوەی ئەمساڵ ئەو ڕێککەوتنە شومە لەسەر شنگال بڵاوکرایەوە. ئەوەمان بۆ ڕوندەبێتەوە لە پشتی ئەو ڕێککەوتن و بڕیارە دەوڵەتی ناوچەیی وەک تورکیا هێزی هەژمونەگەری وەک ئەمریکای تێدایە، هەریەک لە عێراق، ئەمریکا، تورکیا و پارتی لەسەر میزێک کۆبونەوە و ئەو پلانەیان داڕشت بە ناوی ڕێککەوتن، ئێمە پرسیار دەکەین بۆچی خەڵکی شنگال لەسەر ئەو مێزە نەبون؟

سەرۆكی ئەو حزبە كوردییەی شنگال باسی لەوەشكردوە،”لە ئێستادا ئێمە پرسیار دەکەین پارتی دیموکراتی کوردستان بۆ ناچێت لەسەر کەرکوک ڕێککەوتن بکات، ئەی ئەوان ناڵین “کەرکوک دڵی کوردستانە” ئەی بۆ ناچن لە گەڵ حکومەتی عێراق لەسەر کەرکوک ڕێککەون. لەبەر ئەوەی گەلی ئیزدی دەگەڕێتەوە شەنگال و ژیان ئاسایی دەبێتەوە دەیانەوێت رێگری لەوە بکەن و گرفتی بۆ دروست بکەن، چەند ساڵە و ئێستاش پێش لە خەڵکی دەگیرێت بۆ ئەوەی نە گەڕێتەوە سەر موڵک و ماڵی خۆی، بەم ڕێککەوتنە دەیانەوێت کێشەیەکی نوێ لە ناوچەکە دروست بکەن.”

ئاشكراشیكردوە،”ڕۆژانە نزیکەی 200 ماڵ دەگەڕێتەوە شەنگال، بەڵام پێشیان لێدەگیرێت پێیان دەڵین، مەگەڕێنەوە لە شنگال ژیان ئارام نییە، دەبێت ئیدارەی پێشتر بگەڕێتەوە شنگال، ئێمە پرسیار دەکەین ئیدارەی پێشتری شنگال بۆ رۆیشت، بۆ دوجار ڕایکرد و شنگالییەکانی بە جێهشێت، لە ساڵی 2014 لە کاتی هاتنی داعش و لە 2017 لە کاتی هاتنی حەشدی شەعبی ئەوان رایانکرد، بۆیە ئێمە دەڵێین، بە هێچ شێوەیەک خەڵکی شنگال ئەو هێزانە قەبوڵ ناکەن خەڵکی شەنگالیان بە جێهێشتوە”.

Leave a Reply

Your email address will not be published.

Time limit is exhausted. Please reload the CAPTCHA.